Edwin Loyola: அழகான பெண்ணும் , அண்ணா என்கிற வார்த்தையும்

கினிங் , கினிங் என்ற சத்தம் தொடர்ச்சியாக கேட்டுக்கொண்டே இருந்தது . என்னை யாரால் கட்டுப்படுத்த முடியும் என்று திமிறி வரும் காளை போல அந்த நோக்கியா செல்போன் சத்தமிட்டுக் கொண்டே இருந்தது. அதை நிறுத்துவதற்கு ஒரே ஒரு ஆளால்தான் முடியும் , ஆனால் அவரும் தற்போது கும்பகர்ணன் போல தூங்கிக் கொண்டிருக்கிறார் . பக்கத்து அறையிலிருந்த அப்பா அந்த போனின் சத்தத்தை எல்லாம் மிஞ்சும் வகையில் சத்தம் போட்டார் .

ஏல நாயே ! எந்திரி மணி 7 ஆவுது , இன்னும் தூக்கம் என்ன வேண்டி கிடக்கு உனக்கு ? ஏடி உன் அருமை மகனை எழுப்பு , இன்னைக்கு முதல் நாள் காலேஜ் போக போறனா , இல்லையா ?

அம்மா உடனே வேக வேகமாக வந்து அவன் முதுகில் தட்டி அவனை எழுப்பி , ஏன் ராசா அம்மாவை எழுப்பி விட சொல்ல வேண்டியதுதானே ? ஏன் இதைப் போட்டு இந்த கத்து கத்து வைக்கிற !!

வேகம் வேகமாக எழுந்த பெஞ்சமின் கடிகாரம் பார்த்தான் , நேரே பாத்ரூமுக்கு சென்று முகம் கழுவி பல் தேய்த்து குளித்து கிட்டத்தட்ட எட்டு முப்பது மணிக்கு எல்லாம் ரெடியாகி அவனுடைய டிவிஎஸ் எக்ஸ்எல் - யை எடுத்துக்கொண்டு சுரண்டைக்கு கிளம்பினான் .

நேற்று கல்லூரி போன் செய்து பேசியபோது ஒன்பது இருபது கெல்லாம் கல்லூரி ஆரம்பித்து விடுமென்றும் , சுரண்டைக்கு கல்லூரி பேருந்து சரியாக 8.50 மணிக்கு எல்லாம் வந்துவிடும் என கூறியிருந்தனர் . சீக்கிரம் சுரண்டை சென்று கல்லூரி பேருந்தை பிடித்து விட வேண்டும் என வண்டியை விரட்டினான் . போகிற வழியில்தான் அது என்ன தார்ரோடா இல்லை சின்ன கோடா என்று சொல்வது போலிருந்தது . குண்டும் குழியுமாக ரோடு அந்த ரோட்டில் சென்றால் கண்டிப்பாக வயிற்றுவலி இதுவரை வராதவனுக்கு கூட வந்துவிடும் .

ரோடு என்பதற்கு எந்தவிதமான ஒழுங்கும் அதில் இல்லை ! அது சரி உங்களிடம் இல்லாதவற்றை எங்களிடம் மட்டும் நீங்கள் எப்படி எதிர்பார்க்கலாம் என்று கேட்டன ரோடுகள் ?

பெஞ்சமின் இன்றுதான் B.Ed படிப்பதற்காக முதல் நாள் கல்லூரிக்கு சென்று கொண்டிருக்கிறான் பிஎஸ்சி முடித்து ஐந்து வருடங்கள் ஆன பின்பு திடீரென்று எந்த மரத்தின் அடியிலோ இல்லை , இல்லை , எதினடியிலோ கிடைத்த ஞானத்தினால் இந்த வருடம் B.Ed சேர்ந்திருக்கிறான் .

இவனைப் பற்றி பெரிதாக சொல்ல எதுவுமில்லை 5.8 அடி உயரம் , 2.5 அங்குலம் 88 கிலோ எடை அவனை பார்க்கிற எல்லோருமே தற்போது அவனுடைய வயதை விட ஆறு வயது அதிகமாகவே கணிப்பார்கள் , உபயம் : தொப்பை .

முதல் நாள் என்பதால் சட்டையை பேன்டினுள் புகுத்தி லெதர் பெல்ட் போட்டு , உட்லண்ட்ஸ் ஷூவும் போட்டிருந்தான் . கல்லூரி பேருந்தை பிடித்து ஏறி உட்கார்ந்ததும் மனதில் வேண்டிக்கொண்டான் . கடவுளே எந்த பிகரும் என்னை அண்ணன் என்று சொல்லிவிடக்கூடாது , முக்கியமா நல்ல கலரான ஃபிகர்ஸ் .

கல்லூரி கிட்டத்தட்ட மொத்தம் 70 ஏக்கர்களை விழுங்கி இருந்தது . அந்த கேம்பஸில் இல்லாத கல்லூரிகளே இல்லை எனலாம் ஸ்கூலில் ஆரம்பித்து ஆர்ட்ஸ் , சயின்ஸ் இன்ஜினியரிங் என்று எல்லா கல்லூரிகளுமே இருந்தது .

அவனுடைய வகுப்பில் மொத்தம் 100 பேர் இருந்தனர் . அதில் ஆண்கள் 20 , பெண்கள் 80 . இவனது அருகில் இருந்தவன் சொன்னான் , சார் ஒவ்வொருத்தரும் நான்கு ஃபிகர்களை பிக்கப் பண்ணலாம் ! பரவாயில்லை ! பசங்க எல்லாருக்கும் பொதுப்புத்திதான் போல என்று நினைத்துக் கொண்டான் . B.Ed மற்ற படிப்புகள் போல இல்லை . இதில் சென்ற வருடம் டிகிரி முடித்தவர்களும் இருந்தார்கள் , சென்ற 20 ஆம் நூற்றாண்டில் முடித்தவர்களும் இருந்தார்கள் . ஏனென்றால் கோர்ஸ் அப்படி !

பெண்களிடம் பேச இவனுக்கு அதிகமாகவே கூச்சம் , இவ்வளவுக்கும் இவனும் டிகிரி படித்த போது சகஜமாக பேசுவான் . தற்போது ஐந்து வருட இடைவெளி விழுந்ததால் கொஞ்சம் தயக்கம்.

முதல்நாள் எப்போதுமே முக்கியமானது நினைவுகளுக்கும், கனவுகளுக்கும் . ஒவ்வொரு staff -ஆக வந்து அவர்களை அறிமுகப்படுத்திக்கொண்டு , மாணவர்கள் ஒவ்வொருவரும் தங்களை தாங்களே அறிமுகப்படுத்தி கொள்ளுமாறு கூறினர் .

அவள் யார் ? அந்த நாலாவது பெஞ்சில் , கலராக - கண்ணாடி போட்டுக்கொண்டு , ஜீராவில் விழுந்த ரசகுல்லா போல ? அவள் பெயர் என்ன ? காதுகளை உன்னிப்பாக்கிக் கொண்டான் .

அவள் பெயர் மஞ்சு , என்ன ஒரு 5 அடி இருப்பாள் ! அப்பப்பா ! என்ன ஒரு ஃபேஷியல் எக்ஸ்பிரஷன் ! சுண்டினால் அப்படியே ............ , வேண்டாம் வேண்டாம் அமைதியான குளத்தில் கல்லெரிய கூடாது , அடடா என்ன கலர் பரவாயில்லை ! இந்த B.Ed ஒரு வருடம் போவதே தெரியாது போல , ஒரு வழியாக அவளை எங்கே பார்த்தேன் என ஞாபகம் வந்தது . ஆம்! நான் B.Ed பற்றிய டீடெய்ல்ஸ் விசாரிக்க முதன் முதலில் கல்லூரி வந்தபோது அவளும், அவள் அம்மாவும் பிரின்ஸ்பால் அறைக்கு வெளியே அமர்ந்திருந்தார்கள் , அன்று அவள் பிரவுன் கலர் சுடிதார் அணிந்திருந்தாள் .

கல்லூரி பரவாயில்லை , ஓரளவு நன்றாக தான் போய்க் கொண்டிருந்தது . என்ன நிறைய பெண்கள் என்னை அண்ணா என்று அழைக்கும் போது தான் மனசு ஒரு மாதிரி வலித்தது . இப்படி தெரிஞ்சிருந்தா கழுதை அஞ்சு வருஷமா கொஞ்சம் குறைத்து தின்னிருப்பேன் .

ஒரு மாதம் ஆயிற்று , அவளுடன் நான் இன்னமும் பேசவே இல்லை. நண்பர்களில் ராமனிடம் மட்டும் கூறியிருந்தேன் , அவள் என்னை அதிகமாக டிஸ்டப் செய்கிறாள் என! அவனும் கூட அவன் பங்குக்கு ஒரு சில அணுகுண்டுகளை போட்டான்?

அதுவும் அடிக்கடி உன்னை பாக்குது - இதுவே அவன் கிரவுண்டில் வைத்து சொல்லியிருந்தால் அவனை தூக்கி இரண்டு சுற்று சுற்றி கீழே இறக்கிவிட்டு இருப்பேன் . வகுப்பறை என்பதால் அமைதி காத்தேன் இடையிடையே கொஞ்சம் கொஞ்சம் கவிதையெல்லாம் எழுதினேன் உதாரணத்துக்கு ஒன்று

அவளும் நானும் அதிகமாக பார்த்துக் கொண்டோம்

'நான் பார்க்காத போது அவள் என்னையும் ,

அவள் பார்க்காத போது அவளை நானும்'

(நினைப்புதான்)

தினமும் மனதில் நினைத்துக் கொள்வேன் எப்படியாவது அவளிடம் பேசி விட வேண்டுமென , ஆனால் நினைப்பதோடு சரி . இதுவரை அவளிடம் பேசவில்லை . அவளைப் பற்றிய கொஞ்சம் விஷயங்களும் சேகரித்து இருந்தேன் .

வயது : என்னை விட ஆறு வயது கம்மி ஒருவழியாக என்னுடைய வயதை உங்களிடம் சொல்லவே இல்லை பார்த்தீர்களா !?

இருவரும் ஒரே ரிலிஜியன் ! அவளுடைய அப்பா தமிழன் , அம்மா மலையாளி - ஓஹோ கலப்பினம் என்பதால் தான் சும்மா பூசி மெழுகின மாதிரி இருக்காளோ! சரி எது எப்படியோ கல்யாணம் பண்ணினா இவளைத்தான் !

பாதி வருடம் முடிந்து விட்டது, இன்னும் பேசவே இல்லை . சில சமயம் பேசியிருந்தாலும் , அதுவும் பாடத்தில் வரும் சந்தேகத்தை நிவர்த்தி செய்வதற்காகத்தான் . அவளிடம் எப்படி பர்சனலாக பேசுவது என்று பல முறை ரிகர்சல் செய்து இருப்பேன்.ஆனால் எதுவும் நடக்கவில்லை .

அந்த நாளும் ஒரு வழியாக வந்தது . பொங்கல் விழாவின் போது மஞ்சுவின் பெயர் நிறைய ப்ரோக்ராம்ஸ்-ல் இருந்தது. எங்கள் குரூப்புக்கு நான்தான் லீடர். எனவே மஞ்சுவை தனியாக அழைத்து பொங்கல் பங்ஷன் துவங்குவதற்கு முன்பாக

என்ன சாப்பிட்டாச்சா ?

ஓ சாப்பிட்டேன் , நீங்க சாப்டீங்களா .

அப்புறம் நீங்க என்ன என்ன ப்ரோக்ராம் எல்லாம் பண்றீங்க ஏன்னா , உங்கள் பெயர் நிறைய programs-ல வருது ...

ஓ அப்படியா ! ஒரு நிமிஷம் !!

பின்னர் ஐந்து நிமிடம் கழித்து அவளுடைய நண்பியுடன் வந்தாள் ;

ஒருத்தர் எத்தனை programs participate - பண்ணலாம் ?

நான் இரண்டு எனக் கூறினேன்

உடனே சரி அண்ணா , அப்ப நான் Quiz program-லயும் ரங்கோலி லயும் இருக்கிறேன் !

ஓகே , வா அண்ணா ??

..............

என்ன பாக்கறீங்க? அதிர்ச்சியில கிளியாத காது - ன்னு உலகத்தில எதுவும் இருக்கா ??